Hello Dellie…

Vandat ek kan onthou, wou ek ‘n dokter wees. Ek dink dit het begin met my boetie wat altyd een van my poppe se arms afgebreek, toon afgekou, oor geskeur, of ‘n oog uitgehaal het. Dan het hy my getroos en gesê die pop was in ‘n moerse ongeluk, en ek moet haar nou gesond dokter. Ek het baie pasiënte gehad. Ek het later sommer self nuwe poppe se hare begin afsny vir brein operasies. En hulle dan steke gegee met swart wol. Soms is ‘n oog vervang met ‘n albaster. Of iemand het ‘n lapoor gekry, of iemand anders se arm. Ja, die eerste Brides of Chuckie was myne.
Daarvandaan het ek ‘n paar lewendige pasiënte gehad. In Suidwes was die akkedisse groot en baie. Hulle is onseremonieel oor die kop gedonner met my pa se skoen, en dan geopereer. Wanneer ek klaar was met hulle, het sommiges vyf pote gehad, sommiges geen pote, maar twee sterte. Harte en longe en ander binnegoed is ook oor en weer geruil. En alles is netjies toegewerk. Dan is hulle in visblik-bedjies toegemaak met tissues. Maar hulle wou nie weer wakker word nie, en na twee dae het my ma my met haar slipper gedwing om begrafnis te hou, aangesien die hele stoep toe al gestink het soos die hel. Dit was die einde van my oorplantings fase.

(more…)

Dellie is terug…en sy soek raad

‘n Teer ou sakie wat ek vandag wil aanraak. En dis nogal ‘n lang storie. Ek moet die hele storie vertel, anders sal dit nie sin maak nie. Ek was nie so seker of ek dit hier moet post nie, maar ek weet die meeste van julle het ook al baie dinge deurgemaak. En dat julle ook maar ‘n klomp softies is. Hierdie is nie eintlik MY storie nie. Ek moet net vent hieroor, anders gaan ek ‘n aar bars, maar ek kan dit nie op my eie blog doen nie. Julle sal verstaan as julle die storie lees. So kry maar ‘n koppie koffie, en kyk of jy dalk vir my raad het?

Die saak staan so:

In Januarie 2007, trek hierdie paartjie in ons agterste woonstel in. Man, vrou en twee kinders. Teen die tweede maand wat hulle hier bly, sukkel ons nog om die volle sleuteldeposito te kry. Om nie eens te praat van betaling vir water en elektrisiteit nie. Net daarna, verloor meneer sy werk. Ons ken nie die rede nie.

Hier by maand nommer vier, besef ons dat die kanse skraal is dat ons huurgeld van hulle gaan kry. Nie een van die twee kry werk nie. Maar ons harte is te sag om hulle uit te sit op straat. Daar is twee kindertjies betrokke. Soms sien ons hom om die hoek verdwyn met ‘n TV of CD speler onder die arm – pawnshop toe. Later is daar nie veel meubels oor in die woonstel nie. Ook nie ‘n yskas nie.

(more…)

Howzit Dellie…

Sonskyn Mense

Het jy al agtergekom hoe meeste mense ‘n positiewe of negatiewe energie uitstraal? Sommer so van die eerste oomblik wanneer hulle ‘n vertrek binnestap, bring hulle die sonskyn of die donderstorm met hulle saam. Ek dink die meeste van ons verkies sonskyn mense.

Die rede hoekom ons onsself assossieer met sekere mense of plekke, is omdat hulle ons goed laat voel. Veral in die tye waarin ons vandag leef, is iemand ‘n wenner as hulle ons tog net beter kan laat voel. Ons word gebombardeer met negatiewe gebeure elke dag. Moord, roof, verkragtings word op koerante se voorblaaie uitgebasuin, xenofobiese geweld steek gemeenskappe aan die brand, gesiggies van vermiste kinders skree vir ons vanaf lamppale. Ons voel hulpeloos. Ons smag na iets positiefs.  Al is dit dan net ‘n mens met ‘n positiewe gesindheid.

Dis waar ek dink ons almal ‘n verskil kan maak. Charity begins at home…. Maar dan moet ons leer om ons denke te beheer. Ons denke beheer ons emosies. Ons emosies beheer ons fisiese gesondheid.

(more…)

Howzit Dellie!!

Spring!
Niemand na aan my het nog ooit selfmoord gepleeg, of probeer pleeg nie. Ek sukkel om myself in die skoene te probeer plaas van die ou wat selfmoord pleeg, EN die wat agterbly.
Dit moeilik om te probeer verstaan wat iemand sover dryf. Ekself was nog nooit so moedeloos nie. Dit moet verskriklik wees om absoluut geen ander uitweg te sien as om jouself om die lewe te bring nie. Hoe donker moet jou gemoed nie wees nie! Baie mense dink dit is die toppunt van lafhartigheid, want jy verwyder jouself en los die probleem vir ander om op te los. Ander reken weer dit moet vreeslik baie moed verg om werklik tot so ‘n stap oor te gaan.

(more…)

Hi Dellie…jou gemis

Net gou so bietjie agtergrond vir die van julle wat nie weet nie: my seun het verlede jaar matriek geskryf, en werk nou in die VSA op ‘n rondreisende karnaval tot November.
Gistermiddag kom Seun se pel se sussie hier aan, baie bekommerd, want hulle het lanklaas van M gehoor. En sy kry hom nie gekontak nie, sy foon is af. Sy het ongeveer drie weke terug met hom gepraat terwyl hulle vier uur in die oggend in ‘n tornado shelter was, gereed vir die touchdown vyf uur. Genade, ek het nie eens daarvan geweet nie! Ons het die naweek toe die hondjies gebore is, met Seun gepraat, maar hy het nie ‘n woord oor tornado’s gesê nie!

(more…)

Welkom terug Dellie! Oulike post vandag.Moet bieg ek het gewonder wanneer iemand hierdie ‘issue’ gaan aanraak…behoort leersaam en insiggewend te wees…

Platkuif se gravatar ‘geskiedenis’…een van my Lesotho bouers in die swembad,na ‘n harde dag van ‘job’…ten spyte daarvan dat ons met moeite kommunikeer, het ek nog NOOIT iemand gesien wat so hard kan werk EN so skeef kan bou nie) en wat altyd, maak nie saak hoe moeilik ‘dinge ‘ gaan ,smile nie…

Verlede week het ‘n paar van julle gevra vir ‘n possie oor gravatars en skuilname. Ek self is baie nuuskierig om die stories te hoor. Blixer het hare al verduidelik in ‘n possie op haar blog, en so ook verskeie ander WordPress bloggers.

Maar aangesien baie van julle nie blogs het nie, reken ek die stories agter julle gravatars en skuilname behoort vir baie pret te sorg. Dis tog al soos ‘n familie in die kleine hier, en so gaan ons mekaar dalk net ook beter leer ken en verstaan.

(more…)

Welkom terug Dellie…

Daar is onweerswolke op die blog-horison. Sulke donkeres. En van veêer af kan die bliksemstrale gesien word.

Is ons nie ‘n vreemde spesie nie? Bloggers, bedoel ek. Dit voel soos in my skooldae toe jy aan ‘n sekere “kliek” moes behoort het voordat jy raakgesien of gehoor word. Of enigsins bestaan het. Kyk maar net na die hele slakke en parras kwessie… Ai, en ek het gedink ons word groot en ontgroei dit. Maar ons het tog nie werklik nie. En of jy nou wil of nie, erens gaan jy in ‘n sekere blik gedruk word.

(more…)

Welkom terug Dellie…lyk of daai oog lekker geloer het

WARNING! PG18 - NUDITY!
Die opwinding hang net so dik in die lug soos die rook in die klub. Hy stap op die verhoog, geklee in pikswart. Hy het lang, blonde hare wat in ‘n poniestert agter sy kop saamgevat is. ‘n Cowboy hoed op sy kop. Die vrouens gil. Die ligte flikker. Die musiek se polsende ritme vibreer tot in my sitplek. “Are you ready, ladies?” vra die DJ. “YES! YES! YES!” skree almal. Ek sit my camcorder aan…
Jip, ons is by ‘n stripshow…

(more…)

Hoe was julle langnaweek? Darem ‘n kansie gekry om te braai en te kuier? As dit die geval is, is julle seker nie vandag heeltemal babbelas-loos nie, ten spyte van ons President se opdrag… ja toemaar, ek het ook nie heeltemal geluister nie. So ek hou maar by ietsie ligs vandag, wat nie veel dinkwerk nodig het nie. Veral nie vir my nie!

Dit was ‘n surprise party vir een van ons vriendinne. Sy het reeds Dinsdag verjaar, maar almal het gewerk, so Dinsdagaand was uit. Dit sou in elk geval MEER van ‘n surprise wees as dit nie actually op haar verjaarsdag gebeur nie. Toe reël ons die gedoente vir Donderdagaand.

(more…)

Sy is een van die ‘groot geeste’ in die Afrikaanse Blogsfeer…’n gunsteling vir baie Die ‘tannie’ met DAAI oog wat so lekker vir almal koekeloer…

Welkom Dellie…en relax…die parra’s is dalk kommin,maar hulle is goeie mense…mense -mense…ons tipe mense…geniet…ons watch jou

Me/ sluk ‘n stywe dop, maak keelskoon, haal diep asem, en …

Howzit!

Van nou af sal ek julle Dinsdae kom verveel met dinge uit my alledaagse lewe… net vir so bietjie balans tussen al die opwinding wat julle hier beleef… En nee, ek deel nie foto’s soos die Botha’s nie. Al is ek kommin, het ek darem ook my trots! Sorry! Hehe…

Julle klompie het gesorg dat ek vir ‘n hele week lank nagmerries gehad het oor hierdie possie. Julle is nou nie die maklikste crowd om te please nie…ek is al lank genoeg ‘n roofleser hier om dit te weet. Ek is flippen bang vir julle! Nie vir almal nie, maar ‘n paar van julle maak my regtig baie benoud! En ek het nie ‘n idee gehad hoe om myself hier te kom bekend stel nie.

Ek is nie “iemand” nie, ek ken nie ‘n popster of sy skelmpie persoonlik nie, is redelik oningelig as dit by politiek kom, ek is nie so reguit soos Platty nie, nie so dapper soos Janine nie, nie so snaaks soos Platkuif nie en beslis nie so intellektueel bevoorreg soos Emil en ‘n paar ander nie. Eintlik is ek maar ‘n baie rustige mens, en nogal ‘n vredemaker.

Toe besluit ek dat ek nie nou skielik gaan verander net omdat Platkuif my uitgenooi het om hier te kom deel nie. Ek gaan nie skielik mense begin slegsê en verkleineer nie, sensasie-soek is nie in my aard nie. Maar daar skort niks met my humorsin nie! Toegegee, die bloostelling hier is baie groter as wat ek op my eie kan kry, maar ek is ook nie ‘n “stats” hoer nie, so as julle my nie like nie, wel, dan verdwyn ek maar net weer stil-stil terug daar na my eie ou wêreldjie. No harm done.

Terwyl ek toe Maandag nog naels kou hieroor, val hierdie juweel van ‘n beriggie spreekwoordelik uit die hemel. Klein, weggesteek onder op bladsy 6 van die Volksblad. En ek dog ek lag my ‘n papie… veral gesien in die lig van die algemene besprekings die afgelope tyd hier op Bosparra… Imagine dit was Suid-Afrika… wie sou die popster gewees het???

“Kambodja se gewildste popsensasie het ‘n hofsaak teruggetrek teen ‘n boer wat sy stoetbul na hom vernoem het.

Die land se gewildste popster, Preap Sovath (36), het glo met regsoptrede gedreig nadat die eienaar van ‘n stoetbul van $10 000 (± R77 500) die bul na die sekssimbool genoem het. Sovath is in verskeie plaaslike mediabronne aangehaal waar hy gesê het dat hy regstappe sal doen om sy vrou te beskerm wat glo ontsteld geraak het nadat sy advertensies gesien het waarin “Preap Sovath” se “dienste” teen $100 per dekking, “bevrediging gewaarborg”, aangebied word.

Die ster het egter die naweek bekend gemaak dat hy nie meer regstappe gaan doen nie. Volgens gerugte wat die ronde doen, was ander name wat die boer voorgestel het, glo nie bevorderlik vir die ster óf die bul se “loopbane” nie. “

Sjoe. (me/ vee sweet af van voorkop) Dan is die ys nou hopelik gebreek. En onthou, maak nie saak wat jy face nie… gryp dit aan die horings en ry dit bloots!